އިންޓަރ މިއާމީގެ ކުޅުންތެރިޔާ ލިއޮނެލް މެސީ އިންޑިޔާއަށް ކުރި ދަތުރު ފެށުނީ ހަމަނުޖެހުމާއެކުގައެވެ. ކޮލްކަތާގައި ބޭއްވުނު ޝޯއެއްގައި ޓިކެޓް ނުލިބުމުން ރުޅިއައި ބަޔަކު ފުޅި އުކައި ހަމަނުޖެހުން އުފެދުނެވެ.
ކޮލްކަތާގެ ސޯލްޓް ލޭކް ސްޓޭޑިއަމްގައި ބޭއްވުނު "ދަ ގްރޭޓެސްޓް ޝޯ އޮން އާރތް" ގައި ބައިވެރިވުމަށް މެސީ އިންޑިޔާއަށް ދަތުރުކުރީ ބުރާސްފަތި ދުވަހުއެވެ. މި ޝޯގައި ބްރެޒިލްގެ ކުރީގެ ކުޅުންތެރިޔާ ރޮނާލްޑިންހޯ އާއި ސްޕެއިންގެ ކުރީގެ ކުޅުންތެރިޔާ ކާލެސް ޕުޔޯލް ވެސް ބައިވެރިވިއެވެ.
ނަމަވެސް، ޓިކެޓް ނުލިބުމުން ރުޅިއައި ބަޔަކު ސްޓޭޑިއަމްގެ ބޭރުގައި ހަމަނުޖެހުން އުފައްދައި، ފުލުހުންނާ ޖެހި، ފުޅި އުކައި، ބެރިކޭޑްތައް ވައްޓާލިއެވެ.
ޓިކެޓް ލިބުނު ބައެއް މީހުންނަށް ވެސް ސްޓޭޑިއަމަށް ވަދެވިފައި ނުވާކަމަށް އިންޑިއަން މީޑިއާއިން ރިޕޯޓުކޮށްފައިވެއެވެ.
ސްޓޭޑިއަމްގެ ބޭރުގައި ހަމަނުޖެހުން އުފެދުނު ވަގުތު، މެސީ ސްޓޭޑިއަމްގެ އެތެރޭގައި ކުޑަ ވަގުތުކޮޅަކަށް ފުޓްބޯޅަ ކުޅެލިއެވެ.
މެސީ އިންޑިޔާއަށް ދަތުރުކުރީ ޕްރޮމޯޝަނަލް ޝޯއެއްގައި ބައިވެރިވުމަށެވެ. އޭނާ ކުޅޭނެކަމަށް ބުނެފައިވާ މެޗެއް ނެތެވެ.
އިންޑިއަން ސުޕަރް ލީގް ޓީމެއްކަމަށްވާ މުންބާއީ ސިޓީ އެފްސީގެ ވެރިފަރާތް ރަންޖީތް ބަޖާޖް ވަނީ މެސީ އިންޑިޔާއަށް ގެނައުމަށް އިސްނަގައިގެން މަސައްކަތްކޮށްފައެވެ.
މެސީ ހޮނިހިރު ދުވަހު މުންބާއީއަށް ދަތުރުކުރުމަށް ހަމަޖެހިފައިވެއެވެ.
