ރާއްޖޭގެ ރަށްރަށުގެ ތަރައްޤީއާއި ކައުންސިލްތަކުގެ ހިންގުމާ ގުޅޭގޮތުން މަޝްހޫރު ފަރާތެއް ކަމަށްވާ އައްޔަ ފޭސްބުކްގައި ހިއްސާކޮށްފައިވާ ޝުޢޫރުތަކަކީ ކައުންސިލް އިންތިހާބަކަށް ރައްޔިތުން ތައްޔާރުވަމުންދާއިރު ވިސްނާލުން މުހިންމު ކަންތައްތަކެކެވެ.
މިކަމާ ގުޅިގެން "ޖުމްލަ" ނޫހަށް ދިން އިންޓަވިއުއެއްގައި އައްޔަ ވަނީ އޭނާގެ މި ސްޓޭޓަސްތަކުގެ ފަހަތުގައިވާ މުހިންމު މެސެޖުތައް ތަފްސީލުކޮށްދީފައެވެ.
އައްޔަ ފާހަގަކުރާ ގޮތުގައި ރަށްރަށަށް ކުރާ ޒިޔާރަތްތަކުގައި ކައުންސިލަރުންނާ ބައްދަލުވާއިރު، ރަށުގެ ތަރައްޤީއަށް ބޭނުންވާ އުފެއްދުންތެރި ޚިޔާލެއް ނުވަތަ އައިޑިއާއެއް ގިނަ ފަހަރަށް ނުހުރެއެވެ. ސްޓޭޓަސްތަކުގައި މަޖާ މިސާލުތަކަކާއެކު ބަޔާންކޮށްފައިވަނީ، ބައެއް ފަހަރު ކައުންސިލަށް ހޮވޭ މީހުންނަކީ އެ ދާއިރާއާ އެއްވެސް ގުޅުމެއް ނެތް، އަދި ރަށުގެ ތަރައްޤީއަށްވުރެ ބޮޑަށް އަމިއްލަ ކަންކަމަށް އިސްކަންދޭ މީހުން ކަމަށެވެ. "ކައުންސިލަށް ސައިނިންގ ކޮށްލާފައި މަހަށްދާ މީހުންވެސް އެބައުޅޭ،" އޭނާ ލިޔެފައިވެއެވެ.
ރަށްރަށުގެ ތަރައްޤީގެ ވިސްނުން ހަމައެކަނި ވޮލީ ކޯޓަކާއި، ޕާކަކާއި ނުވަތަ ކުޑަ ޖިމަކާ ހިސާބުން ނިމޭތީ އައްޔަ ވަނީ ކަންބޮޑުވުން ފާޅުކޮށްފައެވެ. އޭނާ ބުނާ ގޮތުގައި ރަށްރަށް ކުރިއެރުވޭނީ ކޮމާޝަލް ނުވަތަ ވިޔަފާރި އުސޫލުން ކަންކަން ކުރަން ދަންނަ ބަޔަކު ކައުންސިލަށް އައިސްގެންނެވެ. ހަމައެކަނި ކަންމަތީ ގްރޫޕްތަކުގައި އުޅެފައި، އެއްވެސް ތަޖުރިބާއެއް ނެތި "އަޅުގަނޑަށް ވާނޭ" ބުނެ ނުކުތުމަކީ ރަށުގެ ތަރައްޤީއަށް އޮތް ހުރަހެއް ކަމަށް އޭނާ ދެކެއެވެ.
އޭނާ އިތުރަށް ބާލާލީ ރާއްޖޭގައި ކިޔަވައިގެން ތިބި ޒުވާނުން ގިނަ ނަމަވެސް، އިންތިހާބުތަކުގައި ނުކިޔަވާ އަދި ތަޖުރިބާނެތް މީހުންނަށް ފުރުޞަތު ލިބޭ ނިޒާމެއް އޮތުމުގެ މައްސަލައަށެވެ. ތަރައްޤީއަށްޓަކައި އެ ދާއިރާއަކުން ކިޔަވައިގެން ތިބި މީހުން ކުރިއަށް ނެރެންޖެހޭ ކަމަށާއި، އެ މީހުންނަށް ފުރުޞަތު ލިބޭނެ ގޮތަކަށް ނިޒާމު ބައްޓަންވާންޖެހޭ ކަމަށް އޭނާ ބުންޏެވެ.
ނިންމާލަމުން އައްޔަ ބުނީ، މި ވާހަކަތަކަކީ ދިވެހިރާއްޖޭގައި ވަރަށް ގިނަ ބަޔަކު ދައްކަންޖެހިފައިވާ ވާހަކަތަކެއް ކަމަށެވެ. ރައްޔިތުން ވޯޓުލާއިރު މިއަށްވުރެ ޒިންމާދާރުވާންޖެހޭ ކަމަށާއި، ކުރިމަތިލާ މީހުންގެ ޤާބިލުކަމާއި، އެމީހުން ދައްކާ ވާހަކައިގެ ބުރަދަނަށް ބަލަންޖެހޭ ކަމަށެވެ. އެޑްމިނިސްޓްރޭޓިވް ދާއިރާއިން ކިޔަވައިގެން ތިބި ކުދިންނަށް ފުރުޞަތު ދިނުމަކީ ސަރުކާރާ ގުޅިގެން ކަންކަން ކުރަން ފަސޭހަވެ، ރަށަށް ހަގީގީ ތަރައްޤީ ލިބޭނެ މަގު ކަމަށް އޭނާ ގަބޫލުކުރެއެވެ.
