ވެލާނާ އިންޓަރނޭޝަނަލް އެއާޕޯޓުގައި ޖެއްސީ އެމެރިކާގެ އަސްކަރީ މަތިންދާ ބޯޓެއް ކަމަށް ދެކެވޭ ވާހަކަތައް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ދޮގުކުރައްވައިފިއެވެ. ރައީސް ވިދާޅުވީ އެއީ އެއްވެސް ހާލެއްގައި ހަނގުރާމަމަތީ ބޯޓެއް ނޫން ކަމަށާއި، އެއީ އާންމު ސިވިލިއަން އެއަރކްރާފްޓެއް ކަމަށެވެ.
ރައީސް ވިދާޅުވީ މިކަމާ ގުޅޭގޮތުން ލިބުނު މަޢުލޫމާތުތަކާ ގުޅިގެން އިތުރަށް ބެއްލެވި ބެއްލެވުމުން އެނގިވަޑައިގަތީ، އެއީ ސިވިލިއަން އެއަރކްރާފްޓެއް ކަމަށާއި، އެ ބޯޓު ރާއްޖެ އައުމަށްޓަކައި މާކުރިން، ޖެނުއަރީ 10 ވަނަ ދުވަހު ހުއްދަ ނަގާފައިވާ ކަމަށް ރައީސް ފާހަގަކުރެއްވިއެވެ.
އެ ބޯޓުގެ ދަތުރުގެ ތަފްސީލު ހިއްސާކުރައްވަމުން ރައީސް ވިދާޅުވީ، "އެ މީހުން އެ ބޯޓު އެރޭ ފުރައިގެން ދިޔައީ ސީޝެލްސްއިން ރާއްޖޭގައި ޖައްސާފައި ތައިލެންޑަށް ދިޔަ އެއްޗެއް. އެއީކީ ހަނގުރާމައެއްގެވެސް ކަމާ ކުޅޭ އެއްޗެއް ނޫން ސިވިލިއަން އެއަރކްރާފްޓެއް އެއީ،" ރައީސް ވިދާޅުވިއެވެ.
މި ބޯޓަކީ އެއްވެސް ކަހަލަ އަސްކަރީ ނުވަތަ ހަނގުރާމަވެރި އޮޕަރޭޝަނަކާ ގުޅުންހުރި އުޅަނދެއް ނޫންކަން ކަށަވަރުކޮށްދެއްވަމުން، ރައީސް ވަނީ އެއީ އާންމު ދަތުރުފަތުރުގެ އުސޫލުން ހުއްދަ ހޯދައިގެން ރާއްޖެއަށް ޖެއްސި ބޯޓެއްކަން ތަކުރާރުކުރައްވާފައެވެ.
