މެދު އިރުމަތީގައި މިހާރު ހިނގަމުންދާ ހަމަނުޖެހުންތަކާއި މަސްރަޙަށް އަންނަމުންދާ ބަދަލުތަކާ ގުޅިގެން، ސައުދީ އަރަބިއްޔާގައި ތިބި ދިވެހި ޢުމްރާވެރިންގެ ކަންކަން ސަރުކާރުން ވަރަށް ގާތުން ބަލަމުންދާ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މި އަހަރުގެ ރަމަޟާން މަހު ޢުމްރާގެ އަޅުކަން އަދާކުރުމަށްޓަކައި މޯލްޑިވްސް ޙައްޖު ކޯޕަރޭޝަންގެ އިތުރުން 20 އަމިއްލަ ކުންފުންޏަކުން ޖުމުލަ 2،000 އަށް ވުރެ ގިނަ ދިވެހިން ސައުދީ އަރަބިއްޔާއަށް ގޮސްފައިވެއެވެ. މީގެ ތެރެއިން ބައެއް ޢުމްރާވެރިން މިހާރު މައްކާގައި ތިބިއިރު، ބައެއް ކުންފުނިތަކުން ރަމަޟާން މަހުގެ 15 ވަނަ ދުވަހު ފުރުމަށް ވަނީ ތާވަލުކޮށްފައެވެ.
ވަޒީރު ޝަހީމް މީސްމީޑިއާގައި ކުރެއްވި ޕޯސްޓެއްގައި ވިދާޅުވީ، ޢުމްރާވެރިންގެ ރައްކާތެރިކަން ކަށަވަރު ކުރުމަށްޓަކައި ކަމާބެހޭ ފަރާތްތަކުން މަސައްކަތް ކުރަމުންދާ ކަމަށެވެ. އަދި މި ދަނޑިވަޅުގައި ހުރިހާ ޢުމްރާވެރިންވެސް ދިވެހި ޚާރިޖިއްޔާގެ އިލްތިމާސްތަކާއި ސައުދީ އަރަބިއްޔާގެ ސަރުކާރުން ނެރޭ އިރުޝާދުތަކަށް ފުރިހަމައަށް ތަބާވުމަށް ވަޒީރު ވަނީ އިލްތިމާސް ކުރައްވާފައެވެ.
ވަޒީރު އިތުރަށް ވިދާޅުވީ، ޚާއްޞަކޮށް މައްކާއާއި މަދީނާގެ އިތުރުން ޖިއްދާގެ އެއާޕޯޓްތަކުގައި ޢަމަލުކުރަންޖެހޭ އުސޫލުތަކާއި އިރުޝާދުތަކަށް ޢުމްރާވެރިން ސަމާލުކަން ދިނުމަކީ މުހިންމު ކަމެއް ކަމަށެވެ. މެދު އިރުމަތީގެ މަސްރަޙު ނުތަނަވަސްވެފައި މިވަނީ ސަރަޙައްދީ ގޮތުން ހިނގަމުންދާ އަސްކަރީ ކުރިމަތިލުންތަކާ ގުޅިގެންނެވެ.
