އިސްލާމްދީނަށް ފުރައްސާރަކުރި ކަމުގެ ތުހުމަތުގައި ފުލުހަށް ހާޒިރުވާން އަންގާފައިވާ، ޓިކްޓޮކްގައި މަޝްހޫރު އަޙްމަދު އާމިރަކީ ޕީއެންސީއާ އެއްވެސް ގުޅުމެއް އޮތް މީހެއް ނޫން ކަމަށް އެ ޕާޓީން މިއަދު ސާފުކޮށްދީފިއެވެ.
އާމިރު ގެންދަނީ ޕީއެންސީގެ ފަރާތުން މާލޭގެ މޭޔަރުކަމަށް ވާދަކުރައްވާ މޫސާ އަލީ ޖަލީލަށް ތާއީދުކުރާކަން ސޯޝަލް މީޑިއާގައި ހާމަކުރަމުންނެވެ. ނަމަވެސް، ވެރިކަންކުރާ ޕީއެންސީން 'އެކްސް' ގައި ކުރި ޕޯސްޓެއްގައި ބުނެފައިވަނީ، އާމިރަކީ އެ ޕާޓީގެ ރަސްމީ އެއްވެސް ހަރަކާތެއްގައި ބައިވެރިވާ ނުވަތަ އެއްވެސް ގުޅުމެއް އޮތް ފަރާތެއް ނޫން ކަމަށެވެ.
މީގެ އިތުރުން، އިސްލާމްދީނުގެ ހުރުމަތް ކަނޑައި ފުރައްސާރަކުރުން ފަދަ ނާތަހުޒީބު އަމަލުތައް އެންމެ ހަރުކަށި އިބާރާތުން ކުށްވެރިކުރާ ކަމަށްވެސް އެ ޕާޓީން ބުނެފައިވެއެވެ.
ސޯޝަލް މީޑިއާގެ އެކި ވަސީލަތްތައް ބޭނުންކޮށްގެން ދީނަށް ފުރައްސާރަކޮށް، ރައްޔިތުންގެ ދީނީ އެއްބައިވަންތަކަން ގެއްލޭ ފަދަ ވާހަކަތައް ދެއްކި މައްސަލައިގައި، ތަހުގީގަށް ސުވާލުކުރުމަށް އާމިރު ފުލުހަށް ހާޒިރުވާން އަންގާފައިވަނީ މިދިޔަ އަންގާރަ ދުވަހުއެވެ.
