ބ. އޭދަފުށީގައި އެންމެ ރީތި މިސްކިތް ބިނާކޮށްދެއްވި، މުހައްމަދު އަލީ ނިޔާވެއްޖެ

އާއިޝަތު އަނާ ރަޝީދު
 
6 ގަޑިއިރު ކުރިން

ބ. އޭދަފުށީގައި ރާއްޖޭގެ އެންމެ ޗާލު އަދި އެންމެ ރީތި މިސްކިތް ބިނާކޮށްދެއްވި ވިޔަފާރިވެރިޔާ މުހައްމަދު އަލީ، މިރޭ ނިޔާވެއްޖެއެވެ. ނިޔާވިއިރު އުމުރުފުޅަކީ 91 އަހަރެވެ. އެނގިފައިވާ ގޮތުގައި މުހައްމަދު އަލީ ނިޔާވީ އިންޑިއާގައި ސިއްހީ ފަރުވާ ހޯއްދަވަމުން ގެންދަވަނިކޮށެވެ. އޭނާ ނިޔާވިއިރު އުޅުއްވީ މުސްކުޅި ބަލީގައި ކަމަށްވުމާއެކު، ފުރޮޅުލީ ގޮނޑިއެއްގައި އިންނަވަން ޖެހިވަޑައިގެންފައި ހުރިކަމަށްވެއެވެ.

މުހައްމަދު އަލީގެ ޚަރަދުގައި ބިނާކުރެއްވި މިސްކިތަކީ، 'މަސްޖިދުލް މުހައްމަދު އަލީ' އެވެ. ރާއްޖޭގައި ހުންނާނެ އެންމެ ޗާލު، އެންމެ ރީތި މިސްކިތުގެ ގޮތުގައި ގިނަ ބަޔަކު ސިފަކޮށްފައިވާ މި މިސްކިތް ހުޅުވީ މިދިޔަ މާރިޗު މަހުގެ 20 ގައެވެ. މި މިސްކިތުގެ އަމަލީ މަސައްކަތް ފެށީ މީގެ ހަތަރު އަހަރު ކުރިންނެވެ. މި މިސްކިތް ގިނަ ބަޔަކަށް ކަމުދިޔައީ، ރާއްޖޭން އާންމުކޮށް ނުފެންނަ، ހިތްގައިމު އިސްލާމީ ޑިޒައިނަކަށް މި މިސްކިތް ހުރުމުންނެވެ.

ދެ ފަންގިފިލާއަށް އިމާރާތްކޮށްފައިވާ މަސްޖިދުލް މުހައްމަދު އަލީގައި 1،200 މީހުންނަށް އެއްފަހަރާ ނަމާދު ކުރެވޭނެއެވެ. މި މިސްކިތް ފަރުމާކޮށްފައިވަނީ އޮމާނާއި އުޒްބެކިސްތާނާއި ދުބާއީއާއި ސައުދީ އަރަބިއްޔާއާއި ތުރުކީގެ މިސްކިތްތައް އަސްލަކަށް ބަލައިގެންނެވެ. މިހާރު މި މިސްކިތަކީ ގިނަ ބައެއްގެ މެދުގައި މަގުބޫލު މިސްކިތެކެވެ. އެ ތަނުގެ ފަރުމާތަކާއި މިސްކިތުގެ ފުރިހަމަކަމަށް ގިނަ ބަޔަކު ތައުރީފު ކުރެއެވެ.

މުހައްމަދު އަލީއަކީ ބ. އޭދަފުއްޓަށް ގިނަ ޚިދުމަތްތަކެއް ކުރައްވައި، ރަށް ތަރައްގީ ކުރުމުގައި މުހިންމު މަސައްކަތްތަކެއް ކުރައްވާފައިވާ ބޭފުޅެކެވެ. އޭނާ ވިޔަފާރި ކުރެއްވި ދުވަސްވަރު، އަމިއްލަ މަސްދޯނިފަހަރާއި މުދާ އުފުލާ ދޯނިތައް ވެސް ގެންގުޅުއްވިއެވެ. މީގެ އިތުރުން، ބ. އަތޮޅުގެ ބައެއް ފަޅު ރަށްރަށާ ހަވާލުވެ، ބަލަހައްޓަވައި، ބަކަރި ގެންގުޅުއްވުމުގެ މަސައްކަތް ވެސް އޭނާ ކުރެއްވިއެވެ. މުހައްމަދު އަލީގެ މި ޚިދުމަތްތަކުގެ ހަނދާން އޭދަފުށީގެ ރައްޔިތުންގެ ހިތްތަކުގައި އަބަދަށް ދެމިއޮންނާނެއެވެ.