އެމްއެމްޕީއާރްސީގެ ބޮޑު ޚިޔާނާތުގެ މައްސަލައާ ގުޅިގެން ކުރީގެ ބަންޑާރަނައިބު ޢާއިޝަތު އާޒިމާ ޝަކޫރުގެ މައްޗަށް ދައުލަތުން އުފުލި ދެ ދައުވާ އަނބުރާ ގެންދަން ޕްރޮސެކިއުޓާ ޖެނެރަލް (ޕީޖީ) އޮފީހުން މިއަދު ނިންމައިފިއެވެ. 

މި ދައުވާތަކަކީ މަނީ ލޯންޑްރިންއަށް މަގުފަހިކޮށްދިނުމާއި، ރަސްމީ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާތަކެވެ.

އާޒިމާއާ ދެކޮޅަށް މި ދައުވާތައް ދައުލަތުން އުފުލާފައިވަނީ 2019 ވަނަ އަހަރުގެ ފެބްރުއަރީ މަހުގެ 17 ވަނަ ދުވަހުއެވެ. މި މައްސަލަތަކަކީ ކުރީގެ ރައީސް އަބްދުالله ޔާމީން އަބްދުލްގައްޔޫމް މަނީ ލޯންޑާ ކުރެއްވި ކަމަށް ތުހުމަތުކުރެވުނު މައްސަލައާ ގުޅިގެން އުފުލިފައިވާ ދައުވާތަކެކެވެ. ނަމަވެސް، ޕީޖީން މިއަދު ވަނީ އެ މައްސަލަ އިތުރަށް ކުރިއަށް ނުގެންދަން ނިންމާފައެވެ.

ޕީޖީ އޮފީހުން މިގޮތަށް ނިންމި ސަބަބު ބަޔާންކުރަމުން ބުނީ، އާޒިމާގެ ފަރާތުން އެ އޮފީހަށް ހުށަހަޅާފައިވާ ކަންކަމަށް ރިއާޔަތްކުރުމަށްފަހު އަދި އާޒިމާގެ މައްޗަށް ތުހުމަތުކުރެވޭ ކުށުގެ އަމަލުގެ ސަބަބުން މަގުފަހިވި މަނީ ލޯންޑްރިން ކުށުގެ އަސްލު ފާއިލު ކަމަށްވާ ރައީސް ޔާމީންގެ މައްޗަށް ކުށް ސާބިތުނުވާކަމަށް ސުޕްރީމް ކޯޓުން ހުކުމްކޮށްފައިވާތީ ކަމަށެވެ. ދަށު ކޯޓުން ރައީސް ޔާމީނަށް ކުރި ހުކުމް ސުޕްރީމް ކޯޓުން ބާތިލުކުރުމާ ގުޅިގެން، އެ ދައުވާތައް ކުރިއަށް ގެންދިއުމުގެ ގާނޫނީ އަސާސެއް ނެތް ކަމަށް ޕީޖީން ވަނީ ނިންމާފައެވެ.

މި ދައުވާތައް ބާތިލްކޮށްދިނުމަށް އެދި އާޒިމާ ވަނީ މީގެ ކުރިން ހައިކޯޓާއި ސުޕްރީމް ކޯޓަށް ވެސް ހުށަހަޅާފައެވެ. ނަމަވެސް އެ ދެ މަތީ ކޯޓުން ވެސް ނިންމާފައިވަނީ އެ ދައުވާތައް ބާތިލް ކުރަން ޖެހޭ ގާނޫނީ އަސާސެއް ނެތް ކަމަށެވެ. އެހެންނަމަވެސް، ރައީސް ޔާމީންގެ މައްސަލަ ނިމުމުން، ޕީޖީން ވަނީ މި ނިންމުން ނިންމާފައެވެ.

ފާހަގަކޮށްލެވޭ ގޮތުގައި އާޒިމާއަކީ މިހާރުގެ ރައީސް ޑރ. މުހައްމަދު މުއިއްޒުގެ އާއިލާގެ ގާނޫނީ ވަކީލެވެ. ރައީސްގެ އަނބިކަނބަލުން ހުށަހެޅުއްވި މައްސަލަތަކުގައި ވެސް ވަކާލާތުކުރެއްވީ އާޒިމާއެވެ. މީގެ އިތުރުން، އާޒިމާ ވަނީ ޕީއެންސީގެ ޓިކެޓުގައި މާލޭ މޭޔަރުކަމަށް ވެސް ވާދަކުރައްވާފައެވެ.

އާޒިމާގެ މައްޗަށް އުފުލި ދައުވާތައް އަނބުރާ ގެންދިއުމުގެ ކުރިން، އޭނާގެ ބޭބެ، އާތިފް ޝަކޫރުގެ މައްޗަށް އެމްއެމްޕީއާރްސީގެ ޚިޔާނާތާ ގުޅިގެން އުފުލި ދައުވާ ވެސް ޕީޖީން ވަނީ ބާތިލުކޮށްފައެވެ. އާތިފްގެ މައްޗަށް ދައުވާ އުފުލާފައިވަނީ މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ދަށުން ހިންގާ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ)ގެ އިސްވެރިޔާގެ މަގާމުގައި ހުންނަވައި، ޝައްކު ކުރެވޭ މުއާމަލާތްތައް ރިޕޯޓުނުކުރި ކަމަށް ބުނެއެވެ. އާތިފް ޝަކޫރު މިހާރު ހުންނެވީ ސަރުކާރުގެ މަސް ކުންފުނި މިފްކޯގެ އެޑްވައިޒަރެއްގެ މަގާމުގައެވެ.