ގއ. އަތޮޅު ހޮސްޕިޓަލުގެ އިހުމާލުގެ ސަބަބުން، ސަތާރަ އަހަރަށްފަހު މިއަދު ވިހެއި އަންހެން ދަރިފުޅު މަރުވެފައިވާކަމަށް ބުނެ، އެ ކުއްޖާގެ މަންމަގެ އާއިލާއިން ބޮޑު ކަންބޮޑުވުންތައް ފާޅުކޮށްފިއެވެ. 

އާއިލާއިން ތުހުމަތުކުރާ ގޮތުގައި، މާބަނޑު މަންމައަށް ލިބެންޖެހޭ ފަރުވާ ނުލިބި ލަސްވުމުގެ ސަބަބުން މި ހިތާމަވެރި ހާދިސާ ހިނގީއެވެ. މި ހާދިސާގައި މަރުވީ ގއ. ދާންދޫއަށް ނިސްބަތްވާ އުމުރުން 38 އަހަރުގެ އަންހެނަކު ވިހެއި އަންހެން ކުއްޖެކެވެ.

ފަރުވާ ދިނުމުގައި ލަސްވުންތައް

އާއިލާގެ ފަރާތުން މައުލޫމާތު ދިން މީހަކު ވިދާޅުވީ، މާބަނޑުއިރު ރަހިމުގެ ދޮރާ ދިމާލުން ލޭ އަންނާތީ އެންމެ ފުރަތަމަ ދެއްކީ ދާންދޫ ސިއްހީ މަރުކަޒަށް ކަމަށެވެ. އެތަނުން ރިފާކުރުމުން މާލެ އައިސް އައިޖީއެމްއެޗްގެ ޑޮކްޓަރަކަށް ދެއްކިއެވެ. ޑޮކްޓަރުން ފާހަގަކުރެއްވީ ލޭ އަންނަނީ ރަހިމުގެ ދޮރާ ދިމާއިން ހުޅުވިފައި ހުރުމުން ކަމަށާއި، އެހެންވެ އެތަން ފަހައި، ރަނގަޅުވަންދެން ހޮސްޕިޓަލުގައި އެޑްމިޓްކުރި ކަމަށެވެ. ފަރުވާއަށްފަހު ރަނގަޅުވެގެން ދާންދޫއަށް ދިޔަ ނަމަވެސް، މާގިނަ ދުވަހެއް ނުވެ އަނެއްކާވެސް ލޭ އައުމުގެ މައްސަލަ ދިމާވިއެވެ.

މި މަހުގެ ހަތްވަނަ ދުވަހުގެ ދަންވަރު ލޭ އަންނާތީ ގއ. ވިލިނގިލީގައި ހުންނަ އަތޮޅު ހޮސްޕިޓަލަށް ދެއްކުމުން އެޑްމިޓް ކުރިއެވެ. އާއިލާއިން ބުނި ގޮތުގައި މިއަދަށް (ނުވަ ދުވަސް) ވީއިރުވެސް އެއްވެސް ރަނގަޅު ފަރުވާއެއް ދެވިފައިނުވެއެވެ. އެމަޖެންސީ ހާލަތެއް ދިމާވެއްޖެނަމަ ފޮނުވާލަން ޖެހެނީ ތިނަދޫ ނުވަތަ މާލެއަށް ކަން އެނގޭތީ، އާއިލާއިން ވަނީ ޑޮކްޓަރުގެ ކައިރީގައި މާލެއަށް ރިފާކޮށްދިނުމަށް އެދިފައެވެ. ސަބަބަކީ ކުރީ ފަހަރުވެސް ރިފާކޮށްގެން މާލެއަށް ފޮނުވީތީއެވެ.

ރިފާކޮށްދިނުމަށް ޑޮކްޓަރު ދެކޮޅު ހެދުން

ނަމަވެސް އާއިލާއިން ބުނި ގޮތުގައި، ހޮސްޕިޓަލުގައި އެފަދަ ފަރުވާއެއް ދެވެން ނެތްކަން އެނގިތިބެ ވެސް ޑޮކްޓަރު ވަނީ މާލެއަށް ފޮނުވަން ދެކޮޅު ހަދާފައެވެ. އަދި ބުނަމުން އައީ މާބަނޑު އަންހެން މީހާއާއި ދަރިފުޅުގެ ހާލު ރަނގަޅުކަމަށެވެ. އާއިލާގެ މެންބަރަކު ވިދާޅުވީ، ޑޮކްޓަރު ބުނީ: "ތިމަންނަމެންނަށް ނުއެއް ފޮނުވޭނޭ. ތިމަންނަމެން ހޭންޑްކުރާނަމޭ، މެނޭޖުވާނޭ، ދަންޏާ ދާންޖެހޭނީ އަމިއްލައަށޭ" މިހެންނެވެ. އާއިލާއިން ފާހަގަކުރީ އަމިއްލައަށް ދިއުމަކީ އެ ހާލަތުގައި ކުރެވޭނެ ކަމެއް ނޫން ކަމަށެވެ.

އާއިލާއިން އިތުރަށް ބުނީ، ހާލު ރަނގަޅު ކަމަށް ބުނަމުން އައި ނަމަވެސް، ޑޮކްޓަރުގެ އެންގުމުގެ މަތިން ތިން އިރު ޕެރަސެޓަމޯލާއި، ތަދުކަނޑުވާ ބޭހާއި، ޕެނެޑޯލް އަދި އައިވީ ވެސް ދެމުން އައި ކަމަށެވެ. ނަރުހުން ވެސް މިކަމާ ސުވާލުކުރި ނަމަވެސް ޑޮކްޓަރުގެ އަމުރަށް މަޖުބޫރުވީއެވެ.

މަރުވުން

އެންމެ ފަހުން ރޭ ދަންވަރު 03:00 ހާއިރު ވަރަށް ބޮޑަށް ލޭ އައުމާއެކު، ލޭ ހުރީ ގަނޑުގަނޑަށް (ބްލަޑް ކްލޮޓް) ހުރި ގޮތަށް ކަމަށް އާއިލާއިން ބުންޏެވެ. މިކަމާ ކަންބޮޑުވެ ހޮސްޕިޓަލުން ޑޮކްޓަރަށް ގުޅުމުން ވެސް ޑޮކްޓަރު ވާހަކަދެއްކީ ހިތްހަމަނުޖެހިގެން ކަމަށް އާއިލާއަށް އެނގުނެވެ. ޑޮކްޓަރަށް ހޮސްޕިޓަލަށް އާދެވުނު އިރު އަންހެންމީހާ ވިހައިވެސްފިއެވެ. ނަމަވެސް، ފަރުވާ ލަސްވުމުގެ ސަބަބުން ކަމަށް އާއިލާއިން ބުނާ، މި 17 އަހަރުގެ އިންތިޒާރަށްފަހު ލިބުނު އަންހެން ދަރިފުޅު މަރުވިއެވެ.

އާއިލާއިން ބުނި ގޮތުގައި، އެ އަންހެންމީހާ ވިހެއީ ހޮސްޕިޓަލުގެ ވޯޑު ތެރޭގައި، އެނދުމަތީގައެވެ. މިއީ ހޮސްޕިޓަލުން ފަރުވާ ދިނުމުގައި އިހުމާލުވެފައިވާކަމަށް އާއިލާއިން ތުހުމަތުކުރާ މައްސަލައެކެވެ.

އާއިލާއިން ފާހަގަކުރި ގޮތުގައި، ހޮސްޕިޓަލުގައި މާބަނޑު މީހަކު އެނދުމަތިކޮށްފައި އޮތްކަން ހޮސްޕިޓަލުގެ މެނޭޖުމަންޓަށް އެނގުނީ ވެސް އާއިލާއިން ގުޅައިގެންނެވެ. އެހެންކަމުން، އެ އަންހެންމީހާ ނުވަ ދުވަސް ވަންދެން އެނދުމަތިކޮށްފައި ބޭއްވީ، އެކަށީގެންވާ ޚިދުމަތް ނުލިބޭނެކަން އެނގިތިބެ ކަމަށް ވެސް އާއިލާއިން ސުވާލު އުފެއްދިއެވެ. އަދި ބަލިމީހާއަށް ދޭނެ ފަރުވާއެއް ނޭނގި، ހޮސްޕިޓަލުގައި ބޭއްވީ ކީއްވެތޯ ވެސް އާއިލާއިން ސުވާލުކުރިއެވެ.

މި މައްސަލަ ކަމާބެހޭ އިދާރާތަކަށް ހުށަހެޅުމުގެ ތައްޔާރީތައް އަންނަނީ ވަމުން ކަމަށް އާއިލާއިން ބުންޏެވެ.

މި މައްސަލައާ ގުޅިގެން ގއ. އަތޮޅު ހޮސްޕިޓަލްގެ މެނޭޖަރު ވިދާޅުވީ، އާއިލާއިން މިކަން ހުށަހަޅައިފިނަމަ، ހޮސްޕިޓަލުގެ އުސޫލުތަކާ އެއްގޮތަށް މިކަން ބަލައި، ފިޔަވަޅު އަޅާނެ ކަމަށެވެ. އަދި ޑޮކްޓަރުގެ ފަރާތުން މައްސަލައެއް ފެނިއްޖެނަމަ ވަޒީފާއިން ވަކިކުރުމުގެ ފިޔަވަޅު އަޅާނެކަމަށް ވެސް އޭނާ ވިދާޅުވިއެވެ.