ގއ. ވިލިނގިލީގައި ހިނގި އެކްސިޑެންޓެއްގައި ބޮޑެތި އަނިޔާތަކެއް ލިބުނު ޒުވާނާއަށް ފަރުވާ ދެމުން ދަނިކޮށް ނިޔާވެއްޖެއެވެ.
މި ހާދިސާގައި އަނިޔާވި ވިކާޝް އަހުމަދު މާލެ ގެނެސް ފަރުވާ ދެމުން ދަނިކޮށް ނިޔާވީ މިއަދުއެވެ.
މިދިޔަ ހޯމަ ދުވަހުގެ ރޭ ވިލިނގިލީގައި ހިނގި އެކްސިޑެންޓުގައި އަނިޔާވި ވިކާޝް އަހުމަދު، އިތުރު ފަރުވާއަށް މިދިޔަ އަންގާރަ ދުވަހު ވަނީ މާލެ ގެނެސްފައެވެ. ނަމަވެސް އައިޖީއެމްއެޗްގައި ފަރުވާ ދެމުން ދަނިކޮށް މިއަދު އޭނާ ނިޔާވިއެވެ. އޭނާ ވަޅުލާފައި ވަނީ މިއަދު މެންދުރު ނަމާދަށްފަހުއެވެ.
ފުލުހުންގެ މީޑިއާ އޮފިޝަލެއް ދެއްވި މައުލޫމާތުގައިވާ ގޮތުން، ވިކާޝް އެކްސިޑެންޓްވީ އޭނާ ދުއްވަން އިން ސައިކަލް ގެއެއްގެ ފާރުގައި ޖެހިގެންނެވެ. އަދި އޭނާ ވެއްޓިފައި އޮއްވާ ފެނުނީ އެ ރޭ މެންދަމު 1:30 ހާއިރު ރަށުތެރެ ޕެޓްރޯލް ކުރަމުން ދިޔަ ފުލުހުންނަށެވެ.
މައުލޫމާތު ލިބިފައިވާ ގޮތުގައި، ވިކާޝްއަށް ވަނީ ފަހަކަށް އައިސް ފިޓް ޖެހުމުގެ މައްސަލަ ދިމާވާން ފަށާފައެވެ. އަދި އެކްސިޑެންޓް ހިނގީ ވެސް ފިޓް ޖެހިގެން ކަމަށް ލަފާ ކުރެވޭ ކަމަށް، އެ ރަށުގެ މީހަކު ވަނީ ބުނެފައެވެ. އެ ރަށު މީހަކު އިތުރަށް ބުނީ، ވެއްޓުނުތާ އެތައް އިރެއް ފަހުން ފުލުހުންނަށް އޭނާ ފެނުނީ ގޯޅިއެއްގައި އޮއްވާ ކަމަށެވެ.
