އައްޑޫ ސިޓީގައި މި މަހުގެ 25 ވަނަ ދުވަހު ބޭއްވުމަށް ހަމަޖެހިފައިވާ ރެފަރެންޑަމްގައި، އައްޑޫ ސިޓީ އެއް ކައުންސިލެއްގެ ގޮތުގައި ދެމެހެއްޓުމަށް ވޯޓު ދިނުމަށް ހިތަދޫ މެދު ދާއިރާގެ މެންބަރު އަހުމަދު އަޒާން ރައްޔިތުންނަށް އިލްތިމާސް ކޮށްފިއެވެ. 

އައްޑޫ ރައްޔިތުންގެ ކަންބޮޑުވުންތަކަށް ރިއާޔަތްކޮށް، މި ވޯޓު ނެގުމަށް ވަޒީރުންގެ މަޖިލީހުން ނިންމާފައިވަނީ އޮކްޓޯބަރު 5 ގައެވެ.

އެކްސްގައި ކުރެއްވި ޕޯސްޓެއްގައި އަޒާން ފާހަގަކުރެއްވި ގޮތުގައި، މާލެ ފިޔަވައި ދިވެހިރާއްޖޭގެ އެންމެ ބޮޑު އާބާދީ އޮތް ސަރަހައްދަކީ އައްޑޫ ކަމަށްވުމުން، މިއީ އައްޑޫގެ ސިޔާސީ ބާރުވެރިކަމުގެ އެންމެ މުހިންމު ބިންގަލެވެ. އެހެންކަމުން، އައްޑޫ އެއް ޔުނިޓެއްގެ ގޮތުގައި ދެމެހެއްޓުމަކީ މުހިންމު ކަމެއް ކަމުގައި އޭނާ ވިދާޅުވިއެވެ.

އައްޑޫ ބަހުން ކުރެއްވި ޕޯސްޓުގައި އަޒާން ވިދާޅުވެފައިވަނީ، ހިތަދޫގައި އިދާރީ ނިޒާމު ގާއިމުވެފައި އޮތުމުން އެހެން އަވަށްތަކަށް ދިމާވާ ދަތިތައް ގަބޫލުކުރައްވާ ކަމަށެވެ. ނަމަވެސް، މި މައްސަލަ ހައްލުކުރެވޭނީ ކައުންސިލްތައް ވަކިކުރުމުގެ ބަދަލުގައި، އިދާރީ އިންތިޒާމުތައް ހަރުދަނާކޮށްގެން ކަމަށް އޭނާ ފާހަގަކުރެއްވިއެވެ.

ރައީސް މުއިއްޒު މި މައްސަލައިގައި ސަރުކާރުގެ ވަކި ސްޓޭންޑެއް ނެތް ކަމަށް ވިދާޅުވެފައިވީ ނަމަވެސް، އަޒާން ފިޔަވައި ޕީއެންސީގެ ގިނަ ސިޔާސީ ފަރާތްތަކުން ތާއީދުކުރަމުންދަނީ އައްޑޫ ވަކިވަކި ކުރުމަށެވެ. އަދި މި ވޯޓާ ދިމާކޮށް ރައީސް މުއިއްޒު އައްޑޫއަށް ދަތުރެއް ކުރެއްވުމަށްވެސް ވަނީ ހަމަޖެހިފައެވެ.