ވެލާނާ އިންޓަރނޭޝަނަލް އެއަރޕޯޓުގެ އައު އިންޓަރނޭޝަނަލް ޕެސެންޖަރ ޓާރމިނަލްގެ ކުރިމަތީގައި ހުރި ޕާކިންގ ސަރަހައްދު، ސެކިއުރިޓީ ކަންބޮޑުވުންތަކެއްގެ ސަބަބުން ޖުލައި މަހު ބަންދުކުރުމަށްފަހު، ކޮންމެ ދުވަހަކު އެއަރޕޯޓަށް މަސައްކަތަށާއި އެހެނިހެން ބޭނުންތަކަށް ދަތުރުކުރާ ސަތޭކަ އެތައް މީހުންގެ ޝަކުވާތަކާ ގުޅިގެން ވަގުތީގޮތުން އަލުން ހުޅުވާލައިފިއެވެ.
އައު އިންޓަރނޭޝަނަލް ޕެސެންޖަރ ޓާރމިނަލްގެ ހުޅަނގު ފަރާތުގައި ހުރި ޕާކިންގ ސަރަހައްދު ވަގުތީގޮތުން ބަންދުކުރީ ޖުލައި 26 ގައި އައު ޓާރމިނަލް ހުޅުވުމުގެ ތައްޔާރީތަކުގެ ތެރެއިން ޖުލައި 17 ގައެވެ. އޭގެފަހުން ގާތްގަނޑަކަށް ދެ މަސްދުވަހު ޕާކިންގ ސަރަހައްދު ބަންދުކޮށްފައި ބެހެއްޓުމުން، ކޮންމެ ދުވަހަކު އެއަރޕޯޓަށް މަސައްކަތަށް ދާ ސަތޭކަ އެތައް މީހުންގެ ކަންބޮޑުވުން އުފެދުނެވެ.
އެއަރޕޯޓުގެ މުވައްޒަފަކު ވޭތުވެދިޔަ ހަފްތާގައި ސަން އަށް ބުނެފައިވަނީ ޕާކިންގ ސަރަހައްދު ބަންދުކުރުމުން މުވައްޒަފުން މަސައްކަތަށް ދިއުމަށް ފެރީއާއި ބަހުގެ ޚިދުމަތް ބޭނުންކުރަން މަޖުބޫރުވެފައިވާ ކަމަށެވެ.
އެމްއޭސީއެލްއިން ވޭތުވެދިޔަ ހަފްތާގައި ވަނީ ޕާކިންގ ސަރަހައްދު ވަގުތީގޮތުން އަލުން ހުޅުވާލުމަށް ނިންމި ނިންމުން އިއުލާންކޮށްފައެވެ.
ބުރާސްފަތި ދުވަހު މުވައްޒަފުންނަށް ފޮނުވި ސަރކިއުލަރއެއްގައި އެމްއޭސީއެލްއިން ބުނެފައިވަނީ އައު ޓާރމިނަލްގެ ހުޅަނގު ފަރާތުގައިވާ ސަރަހައްދު ޕާކިންގ ސަރަހައްދެއްގެ ގޮތުގައި ބޭނުންކުރުމުގައި ހުރި ރިސްކުތަކާ ގުޅިގެން ބައެއް ބަދަލުތައް ގެންނަން ނިންމާފައިވާ ކަމަށެވެ.
ނަމަވެސް އެމްއޭސީއެލްއިން ވަނީ އެއަރޕޯޓުގެ ކަސްޓަމަރުންނާއި، މުވައްޒަފުންނާއި، އެހެނިހެން މުއައްސަސާތަކާއި ކުންފުނިތަކަށް ދިމާވަމުންދާ ދަތިތައް ފާހަގަކޮށް، އެހެންކަމުން އައު ޓާރމިނަލްގެ ކުރިމަތީގައި ޕާކިންގ ސަރަހައްދެއް ހެދުމަށް ނިންމާފައިވާކަން އިއުލާންކޮށްފައެވެ.
އެމްއޭސީއެލްއިން އިތުރަށް ބުނެފައިވަނީ މާލެއާއި ހުޅުމާލެއިން އަންނަ އުޅަނދުފަހަރަށް އެއަރޕޯޓުގެ އިރުމަތީގައިވާ ޕާކިންގ ސަރަހައްދަށް ވަދެނިކުތުން ފަސޭހަކުރުމަށް ލިންކް ރޯޑުގައި ޓްރެފިކް ލައިޓް ބެހެއްޓުމާއި، އެއަރޕޯޓަށް ދުއްވާ ބަހާއި ފެރީގެ އަދަދު އިތުރުކޮށްގެން އެއަރޕޯޓުގެ ޕާކިންގ މައްސަލަތައް ހައްލުކުރުމަށް މަސައްކަތްކުރަމުންދާ ކަމަށެވެ.
