އެމެރިކާގެ ޖެފްރީ އެޕްސްޓީންއާ ގުޅުވައިގެން ކުރީގެ ރައީސް ޑރ. މުހައްމަދު ވަހީދަށް ކުރެވޭ ތުހުމަތުތައް ފުލުހުން އިސްވެ ތަހުގީގު ކުރަމުން ނުދާ ކަމަށް ހޯމްލޭންޑް މިނިސްޓަރު އަލީ އިހުސާން މިއަދު ވިދާޅުވެއްޖެއެވެ.
މި މައްސަލައިގެ ފަސްފަހަތަށް ބަލާއިރު، ކުޑަކުދިންނަށް ޖިންސީ ގޯނާކުރުމުގެ ބޮޑެތި ކުށްތަކެއް ސާބިތުވެފައިވާ އެޕްސްޓީންގެ އީމެއިލްތަކެއް އާންމުވުމާ ގުޅިގެން، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އެޑްވައިޒަރުގެ މަގާމުން ޑރ. ވަހީދު ވަނީ މިދިޔަ މަހު އިސްތިއުފާ ދެއްވާފައެވެ. ރައީސް މުއިއްޒު ފަހުން ވިދާޅުވި ގޮތުގައި އެ މަނިކުފާނު މަގާމުން ވަކިވެވަޑައިގަތީ ސީދާ ރައީސް އެންގެވުމަކަށެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އިހުސާން ވިދާޅުވީ، ޑރ. ވަހީދާ ގުޅޭ އެއްވެސް ޖިނާއީ މައްސަލައެއް މިހާތަނަށް އެއްވެސް ފަރާތަކުން ފުލުހަށް ހުށަހަޅާފައި ނުވާ ކަމަށެވެ. އަދި ފުލުހުންގެ ފަރާތުން އަމިއްލައަށް އިސްނަގައިގެން އެފަދަ ތަހުގީގެއް ފަށާފައި ނުވާ ކަމަށް ވެސް އޭނާ ފާހަގަކުރެއްވިއެވެ. ނަމަވެސް، އެއްވެސް ފަރާތަކުން ޖިނާއީ ކުށެއްގެ ތުހުމަތު ހުށަހަޅައިފި ނަމަ، ވަކި ބޭފުޅަކަށް ބެލުމެއް ނެތް ގޮތުގައި ގާނޫނީ އިޖުރާއަތްތަކުގެ ތެރެއިން އެ މައްސަލަ ބަލާނެ ކަމުގެ ޔަގީންކަން މިނިސްޓަރު ދެއްވިއެވެ.
އާންމުވެފައިވާ އެޕްސްޓީންގެ ފައިލްތަކުން އެނގޭ ގޮތުގައި، ރާއްޖޭގެ ފަތުރުވެރިކަމުގެ ބައެއް މަޝްރޫއުތަކާ ގުޅޭގޮތުން ޑރ. ވަހީދު ވަނީ އެޕްސްޓީންއާ މުއާމަލާތް ކުރައްވާފައެވެ. އޭގެ ތެރޭގައި އިންނަހެރާ އަދި ފުއްގިރި މަޝްރޫއުގެ ވާހަކަތަކާއި، އެޕްސްޓީން މެދުވެރިކޮށް ބޭރުގެ އިންވެސްޓަރުން ހޯދުމުގެ މަޝްވަރާތައް ހިމެނެއެވެ. މީގެ އިތުރުން އެ މަނިކުފާނުގެ ވެރިކަމުގެ ދުވަސްވަރާ ގުޅޭ ފޮތެއް ޝާއިއު ކުރުމަށް އެހީތެރިކަން ހޯދުމަށް ވެސް އެދިވަޑައިގެންފައިވެއެވެ.
މިކަމާ ގުޅިގެން ޑރ. ވަހީދުގެ އޮފީހުން ނެރުނު ބަޔާނެއްގައި ބުނެފައިވަނީ، އެޕްސްޓީންއާ ބައްދަލުކުރެއްވި އިރު އޭނާގެ މައްޗަށް ކުރެވިފައިވާ ބޮޑެތި ޖިނާއީ ތުހުމަތުތަކުގެ މައުލޫމާތު އެނގިވަޑައިގެންފައި ނުވާ ކަމަށެވެ. އަދި އެކަން އެނގިވަޑައިގަތް ނަމަ، އެއްވެސް ބާވަތެއްގެ މުއާމަލާތެއް ނުހިންގަވާނެ ކަމަށް ވެސް އެ ބަޔާނުގައި ބުނެފައިވެއެވެ.
