މި އަހަރުގެ ތެރޭގައި އިންޓަރެކްޓިވް މިއުޒިއަމްގެ މަސައްކަތް ނިންމައި އާންމުންނަށް ހުޅުވައިލުމަށް ސަރުކާރުން އަމާޒު ހިފާފައިވާ ކަމަށް، މިނިސްޓަރ އޮފް ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހީމް މިއަދު ވިދާޅުވެއްޖެއެވެ.
މާލޭގެ އުސްގެކޮޅާއި ކަޅުވަކަރު މިސްކިތް ހުރި ސަރަހައްދުގައި ގާއިމުކުރާ މި ދާރުލްއާސާރަކީ، ޒަމާނީ ވަސީލަތްތަކުގެ އެހީގައި ދިވެހި ތާރީޚާއި ތަރިކަ ތަޖުރިބާކުރެވޭނެހެން ތަރައްގީކުރާ ތަނެކެވެ. ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވިދާޅުވީ، މި މަޝްރޫއު ނިމުމުން ތަރިކައިގެ ދާއިރާއަކީ ދައުލަތަށް އާމްދަނީ ލިބޭނެ ދާއިރާއަކަށް ވެގެންދާނެ ކަމަށެވެ.
ވަޒީރު އިތުރަށް ފާހަގަކުރެއްވި ގޮތުގައި، މި އައު ދާރުލްއާސާރުގެ ސަބަބުން މިހާރު ހުރި ފަންނީ ދާރުލްއާސާރަށް އިންގިލާބީ ބަދަލެއް އަންނާނެއެވެ. މިހާރު ހުރި ދާރުލްއާސާރަކީ އެ ތަން ހުޅުވި ދުވަސްވަރަށް ބަލާއިރު ވަރަށް ފުރިހަމަ ތަނެއް ނަމަވެސް، ދުނިޔޭގެ ކުރިއަރާފައިވާ ގައުމުތަކުގައި މިހާރު ދާރުލްއާސާރުތައް ހުންނަ ފެންވަރަށް ރާއްޖޭގެ ތަރިކަ ދައްކައިދިނުމަށް ބޮޑެތި ބަދަލުތަކެއް ގެންނަން ޖެހިފައިވާ ކަމަށް އޭނާ ވިދާޅުވިއެވެ.
"ރައީސުލްޖުމްހޫރިއްޔާގެ ޚާއްސަ އިރުޝާދުގެ ދަށުން، މިހާރު ހުރި ދާރުލްއާސާރުގެ އެތެރޭގެ އިންތިޒާމުތަކަށް ޒަމާނީ ބަދަލުތައް ގެނައުމުގެ މަސައްކަތް މި އަހަރުގެ ތެރޭގައި ކުރިއަށްދާނެ. އެކަމުގެ ރޭވުންތައް މިހާރު ވަނީ އެކުލަވައިލެވިފައި،" މިނިސްޓަރު ވިދާޅުވިއެވެ.
ޒަމާނީ ޓެކްނޮލޮޖީ ބޭނުންކޮށްގެން އުސްގެކޮޅު ތަރައްގީކުރުމުގެ އަމަލީ މަސައްކަތް ހެރިޓޭޖް މިނިސްޓްރީން ފަށާފައިވަނީ މިއަހަރުގެ ޖަނަވަރީ މަހުގައެވެ. ދިވެހީންގެ ތަރިކަ ރައްކާތެރިކޮށް ދެމެހެއްޓުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަރަށް ބޮޑު އިސްކަމެއް ދެއްވާ ކަމެއްކަން މިނިސްޓަރު ވަނީ ތަކުރާރުކުރައްވައިފައެވެ.
