ސްރީ ލަންކާއަށް ބޮޑެތި ގެއްލުންތަކެއް ދިން 'ދިތުވާ' ތޫފާނުގެ ސަބަބުން ހާލުގައި ޖެހިފައިވާ ރައްޔިތުންނަށް އެހީތެރިކަން ފޯރުކޮށްދިނުމުގެ ގޮތުން، ރާއްޖޭގައި ފުޅާ ދާއިރާއެއްގައި ރިސޯޓް ވިޔަފާރިކުރާ ކްރައުން އެންޑް ޗަމްޕާ ރިސޯޓްސް އިން 10،001 ޑޮލަރު (އެމެރިކާ ޑޮލަރު) ހަދިޔާކޮށްފިއެވެ.

މި އެހީތެރިކަން ފޯރުކޮށްދީފައިވަނީ ޕަބްލިކް ސަރވިސް މީޑިއާ (ޕީއެސްއެމް) އިން އިސްނަގައިގެން މިއަދު ހެނދުނުން ފެށިގެން މިރޭ މެންދަމު 1 ޖެހުމާ ހަމައަށް ކުރިއަށްގެންދާ 'ސިލޯނާ އެކު ދިވެހިން' ނަމަކަށް ކިޔާ ޚާއްސަ ޓެލެތޯނުގެ ތެރެއިންނެވެ. މި ގްރޫޕުން މި އަދަދު ހަދިޔާކުރީ އިންސާނިއްޔަތަށް އެހީވުމުގެ ރޫޙުގައި ވެސް ކަމަށް ވެ އެވެ.

ކްރައުން އެންޑް ޗަމްޕާ ރިސޯޓްސް ގްރޫޕުން 'ދައުރު'އަށް މައުލޫމާތު ދެމުން ބުނެފައިވަނީ، އެ ކުންފުނީގެ ރިސޯޓްތަކުގައި ގިނަ އަދަދެއްގެ ލަންކާ މީހުން މަސައްކަތް ކުރާކަމަށާއި، އެ މީހުންގެ އާއިލާތަކަށާއި އަވަށްޓެރި ޤައުމަށް ދިމާވި މި ހިތާމައިގައި ބައިވެރިވެ، އެހީތެރިކަން ފޯރުކޮށްދިނުމަކީ އެ ކުންފުނީގެ ބޭނުމެއް ކަމަށެވެ.

ޕީއެސްއެމްގެ މި ޓެލެތޯނަށް ފައިސާ ހަދިޔާ ކުރުމުގެ ގޮތުން މާލެ، ހުޅުމާލެ އަދި ވިލިމާލޭގެ ތަފާތު ސަރަހައްދުތަކުގައި ފަންޑުފޮށިތައް ބަހައްޓާނެއެވެ. މި ފޮށިތަކަށް ނަގުދު ފައިސާ ލެވޭނެއެވެ. މީގެ އިތުރުން، ކިއުއާރު ކޯޑު ސްކޭންކޮށްގެންނާއި 7730000796107 ނަމްބަރުގެ އެކައުންޓަށް ފައިސާ ޖަމާކޮށްގެން ވެސް އެހީތެރިކަން ފޯރުކޮށްދެވޭނެ ކަމަށް ޕީއެސްއެމުން ބުނެއެވެ.

ބޭ އޮފް ބެންގަލްގައި އުފެދުނު މި ތޫފާނުގެ ސަބަބުން ލަންކާގެ އެތައް ސަރަހައްދަކަށް ބޯކޮށް ވާރޭވެހި ފެންބޮޑުވުމުގެ ހާދިސާ ދިމާވިއެވެ. ލަންކާގެ ޑިޒާސްޓާ މެނޭޖްމަންޓް ސެންޓަރުން ބުނާ ގޮތުގައި މިހާތަނަށް 159 މީހުން މަރުވެ، 200އަށް ވުރެ ގިނަ މީހުން ވަނީ ގެއްލިފައެވެ. އަދި މި ވިއްސާރައިގެ އަސަރު އެތައް ލައްކަ ބަޔަކަށް ކޮށްފައިވެ އެވެ. ލަންކާއަށް އެހީވުމުގެ މަސައްކަތުގައި ސަން ސިޔާމްގެ ފަރާތުން 200،000 ޑޮލަރާއި، ބީއެމްއެލްއިން 25،000 ޑޮލަރު ވަނީ ހަދިޔާކޮށްފައެވެ. މީގެ އިތުރުން، ދިވެހި ސަރުކާރުން 50،000 ޑޮލަރާއި 25،000 މަސްދަޅު ކޭސް ހަދިޔާކުރަން ވަނީ ނިންމާފައެވެ.