ތޫފާނުގައި ލަންކާއިން މަރުވި މީހުންގެ އަދަދު 200އަށް ވުރެ މައްޗަށް!

އާއިޝަތު އަނާ ރަޝީދު
 
6 ގަޑިއިރު ކުރިން

ތޫފާން ދީތުވާގެ ސަބަބުން ސްރީ ލަންކާއަށް ކުރި ވިއްސާރައިގެ ނަތީޖާއެއްގެ ގޮތުން، އެކި ހާދިސާތަކުގައި މަރުވި މީހުންގެ އަދަދު މަދުވެގެން 212 އަށް އަރާފައިވާ ކަމަށް ޑިޒާސްޓާ މެނޭޖްމަންޓް ސެންޓަރު (ޑީއެމްސީ) އިން މިއަދު ހާމަކޮށްފި އެވެ.

އޮފިޝަލުން ވިދާޅުވީ، ތޫފާނުގެ އަސަރު އެންމެ ބޮޑަށް ކުރި ހިސާބުތަކަށް ލިބުނު ގެއްލުންތަކުގެ މިންވަރު ސާފުވާން ފެށީ، ފެންބޮޑުވުމާއި ކިސަޑު ފޭބުމުގެ ސަބަބުން ބަންދުވެފައިވާ މަގުތަކުން ދަތުރުކުރެވޭނެ ހާލަތަކަށް ވާސިލްވުމަށް ފަހުގައި ކަމަށެވެ.

މި ހަފްތާ ތެރޭގައި ލަންކާއަށް ކުރި ވިއްސާރާގައި މިހާތަނަށް 212 މީހުން މަރުވިކަން ކަށަވަރުވެފައިވާއިރު، 218 މީހުން އަދިވެސް ވަނީ ގެއްލިފަ އެވެ.

ތޫފާން ލަންކާއާ ދުރަށް ދިއުމާއެކު މޫސުން ކޮންމެވެސް ވަރަކަށް ރަނގަޅުވެފައި ވިޔަސް، ބޯކޮށް ވެހުނު ވާރެއިން އުސް ހިސާބުތަކުން ފައިބަމުންދާ ފެނުގެ ސަބަބުން ކެލާނީ ރިވަ ފުރި ބަންޑުންވުމުގެ ނަތީޖާއެއްގެ ގޮތުން ކޮލަމްބޯގެ އުތުރުގެ ބައެއް ސަރަހައްދުތަކުގައި މިއަދު ވަނީ ފެން ބޮޑުވެފަ އެވެ. މިކަމާ ގުޅިގެން ބައެއް ހިސާބުތަކުން މީހުން ސަލާމަތްކޮށް، އެހެން ތަންތަނަށް ބަދަލުކުރަން ޖެހިފައިވެ އެވެ.

އެހީތެރިކަން ފޯރުކޮށްދިނުމުގެ މަސައްކަތުގައި އިންޑިއާއިން ސްރީ ލަންކާއަށް ހެލިކޮޕްޓަރު ފޮނުވައި، މީހުން ސަލާމަތްކުރުމުގެ މަސައްކަތް ކުރިއަށް ގެންދާއިރު، މިއަދު 24 މީހަކު ސަލާމަތްކޮށްފައިވެ އެވެ. އަދި ޕާކިސްތާނުގެ ވައިގެ ސިފައިން ވެސް ލަންކާއަށް ގޮސް އެހީތެރިވާން ފަށާނެ ކަމަށް ބުނެފައިވާއިރު، ޖަޕާނުން ވެސް ލަންކާއަށް މިވަގުތު އެންމެ ބޭނުންވާ މުހިންމު ކަންކަން ދެނެގަތުމަށްޓަކައި ޓީމެއް ފޮނުވުމަށް ވަނީ ނިންމައިފަ އެވެ.

ލަންކާއަށް ފަހުގެ ތާރީޚެއްގައި ކުރިމަތިވި އެންމެ ބޮޑު ގުދުރަތީ ކާރިސާގައި 25،000 އަށް ވުރެ ގިނަ ގެދޮރު ހަލާކުވެ، 147،000 އަށް ވުރެ ގިނަ މީހުން ވަނީ ވަގުތީ ހިޔާތަކަށް ދާން މަޖުބޫރުވެފަ އެވެ. ޑީއެމްސީން ބުނާ ގޮތުގައި ބައި މިލިއަނަށް ވުރެ ގިނަ މީހުންނަށް އެކި އެހީތެރިކަން ބޭނުންވެފައިވެ އެވެ.

މި ތޫފާނަކީ 2017 ވަނަ އަހަރު އެ ގައުމުގައި ފެންބޮޑުވެ ބިންގަނޑު ކަނޑައިގެން ދިއުމުގެ ސަބަބުން 200 އަށް ވުރެ ގިނަ މީހުން މަރުވެ، އެތައް ހާސް ބަޔަކު ގެދޮރު ގެއްލުނު ފަހުން ލަންކާއަށް ކުރިމަތިވި އެންމެ ނުރައްކާތެރި ގުދުރަތީ ކާރިސާ އެވެ. މީގެ ކުރިން ޖޫން 2003 ގައި ހިނގި މިފަދަ ހާދިސާތަކެއްގައި 254 މީހުން މަރުވެފައިވެ އެވެ.