ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މާޅޮސްމަޑުލު ދެކުނުބުރީ މާޅޮހު ކައުންސިލާއި، އ.ތ.މ ކޮމިޓީ އަދި ރަށުގެ ބައެއް މުއައްސަސާތަކުގެ އިސްވެރިންނާ ބައްދަލުކުރައްވައި ރަށު ރައްޔިތުންނަށް އެންމެ މުހިންމު ކަންކަމާ ގުޅޭގޮތުން މަޝްވަރާކުރައްވައިފިއެވެ. 

މި   ކުރިއަށްދިޔައީ މިއަދު މާޅޮހު ސްކޫލްގައެވެ.

މި ބައްދަލުކުރެއްވުމުގައި، ކައުންސިލް މެންބަރުންގެ ފަރާތުން ފާހަގަކުރެއްވި ކަންކަމުގެ ތެރޭގައި މާޅޮހު ބަނދަރުގެ މަސައްކަތް އަވަސްކޮށްދިނުމާއި މިހާރު ދެމުންދާ ކަރަންޓުގެ ޚިދުމަތުގެ ފެންވަރު ރަނގަޅުކޮށް، ކެޕޭސިޓީ މަތިކޮށް، އަދި އިންޖީނުގެ ހުރި ސަރަހައްދުން އެހެން ސަރަހައްދަކަށް ބަދަލުކުރުމާއި ރަށުގައި ފެންބޮޑުވާ މައްސަލައަށް ދާއިމީ ހައްލެއް ބޭނުންވާކަން ހިމެނެއެވެ.

 އަދި މާޅޮހުގައި ލޯކަލް ޓޫރިޒަމް ފުޅާވަމުންދާއިރު ލޭންޑް ޔޫސް ޕްލޭންގައިވެސް އެކަމަށް ޖާގަ ދެވޭނެކަމަށާއި، އެހެންކަމުން ފަތުރުވެރިންނަށް ހާއްސަ ބީޗެއް ތަރައްޤީ ކުރުމަށް ބޭނުންވާކަން ކައުންސިލުން ފާހަގަކުރެއްވިއެވެ. މީގެއިތުރުން ޒުވާނުންނަށް، ކުޅިވަރުގެ ވަޞީލަތްތައް ތަރައްގީކޮށްދިނުމަށް ސަރުކާރުން މާޅޮހުގައި ކުރައްވަމުންގެންދަވާ މަސައްކަތްތައް ކައުންސިލުން ފާހަގަކުރެއްވިއެވެ. 

އެގޮތުން ރަށުގެ ފުޓްބޯޅަ ދަނޑުގެ އެންމެހާ މަސައްކަތް އެކުގައި ނިންމޭނެހެން ކުރިއަށްގެންދަވަން ކައުންސިލުން އެދިވަޑައިގެންނެވިއެވެ. ރަށުގެ ތައުލީމު ކުރިއެރުވުމަށް، އުމުރާނީ ތަރައްޤީގެ އެއްވެސް ކުރިއެރުމެއް ނުލިބޭތާ 15 އަހަރު ފާއިތުވެފައިވާ ކަމަށާއި މިކަމަށް ބަދަލެއް އަންނާނެކަމަށް އުންމީދުކުރައްވާކަން ކައުންސިލްގެ މި ބައްދަލުކުރެއްވުމުގައި ފާހަގަކުރެއްވިއެވެ. 

އެގޮތުން ސްކޫލްގައި މިވަގުތަށް އެންމެ ދަތިވާ ކަމަކީ މަލްޓިޕަރޕަސް ހޯލެއް ނެތުންކަމަށާއި މީގެއިތުރުން ސްކޫލްގެ ސަޓާފްރޫމްގެ ދަތިކަމާއި އޮފީސް އިމާރާތެއް ބޭނުންވާކަންވެސް އެބޭފުޅުން ރައީސުލްޖުމްހޫރިއްޔާއާއި ހިއްސާކުރައްވާފައިވެއެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ކައުންސިލުން ފާހަގަކުރެއްވި ކަންކަން ބައްލަވާނެކަމުގައި ވިދާޅުވެފައެވެ.