ކުރިއަށް އޮތް ކައުންސިލް އިންތިޚާބާ ގުޅުވައިގެން، ރައްޔިތުންގެ ފެންނަ ނުފެންނަ ވޯޓެއް ނެގުމަށް ސަރުކާރުން ނިންމާފައިވާ ނިންމުމަކީ ޤާނޫނުއަސާސީއާ ދެކޮޅަށް ހިންގާ "ބަޣާވާތެއް" ކަމަށް ކުރީގެ ރައީސް އިބްރާހީމް މުޙައްމަދު ޞާލިޙް ސިފަކުރައްވައިފިއެވެ.
މިކަމާ ގުޅޭގޮތުން އިތުރު ތަފްޞީލު ދެއްވަމުން، އެމްޑީޕީން ބޭއްވި ޖަލްސާއެއްގައި ރައީސް ޞާލިޙް ވިދާޅުވީ، 20 ވަނަ ރައްޔިތުންގެ މަޖިލީހުގެ ދައުރު ކުރުކޮށް، ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހެއްގައި ބޭއްވުމާ މެދު ގޮތް ނިންމުމަށް ބާއްވާ މި ވޯޓަކީ އެކަށީގެންވާ މަޝްވަރާއެއް ނެތި، ނުހަނު އަވަސް އަރުވާލައިގެން ކުރިއަށްގެންދާ ކަމެއް ކަމަށެވެ. އަދި ޤާނޫނުއަސާސީއަށް މިފަދަ ބޮޑު ބަދަލެއް ގެނައުމަށް "ސިއްރުވެރި" ގޮތަކަށް ކުރާ މަސައްކަތްތަކަށް ރައްޔިތުން ނޫނެކޭ ބުނަންޖެހޭ ކަމަށްވެސް އެމަނިކުފާނު ވިދާޅުވިއެވެ.
ރައީސް ޞާލިޙް އިތުރަށް ފާހަގަކުރެއްވި ގޮތުގައި، ދެ އިންތިޚާބު އެއްކޮށްލުމަކީ ރައްޔިތުންގެ ބާރުވެރިކަން ކުޑަކޮށް، ވެރިކަމުގެ ބާރުތައް އެއްކުރުމަށް ކުރެވޭ މަސައްކަތެކެވެ. މިއީ ރާއްޖޭގެ ޑިމޮކްރަސީ ހީނަރުކޮށް، ހުދުމުޚުތާރު ވެރިކަމަކަށް މަގުފަހިކުރުމަށް ސަރުކާރުން ރާވާފައިވާ ކަމެއް ކަމަށް ވިދާޅުވެ، އެމަނިކުފާނު ވަނީ މިކަމާ މެދު ނުހަނު ބޮޑަށް ކަންބޮޑުވުން ފާޅުކުރައްވާފައެވެ.
